نعى الشاعر غانم اسطفان عاصي صديقه الشاعر الموهوب المراحل يوسف جرجي نصار قائلاً : خبّر بكرا يا زمان وأوعى تضيّع بالعنوان
عن “زوزو” الشب اللي كان مميز ما بين الشبّان
وخبّر بكرا يا زمان عن “زوزو” شو هالإنسان!!
ذوّيق مهذب فهمان وصاحب ضمير ووجدان
وخبّر بكرا يا زمان عن ابن عايلة أحزان
إسودّت بعيونو الألوان وضل مزنّر بالإيمان
وخبّر بكرا يا زمان كيف لملم دمعو الحرزان
بيّو وأمّو والأخوان وإختو!! ونبع من الحنان
وخبّر بكرا يا زمان عن ابن الجوّ الفَتّان
بين الحقله والوديان مهوشل ورفيق الرعيان
وخبّر بكرا يا زمان ونحنا مع شامات جيران
وبغيبة أطيب انسان حصارات انصابت كمان
وخبّر بكرا يا زمان “زوزو” “بلّاط” أو فنان!!
كيف ما إشتغل بهالبنيان بيرسم لوحاتو بإتقان
وخبّر بكرا يا زمان عن شاعر من دون اعلان
بيبقى بعالم القصدان خالد عا مرّ الأزمان
وخبّر بكرا يا زمان رغم أوجاعو كيف كان
من ربّ القدرة منعان وناطر قدرو ومش فزعان
وخبّر بكرا يا زمان عن ابن ضيعة منزان
عاش بعزّ وعنفوان ووين ما كان عندو خلّان
وخبّر بكرا يا زمان عن حامي مجد الأوطان
وتايبقى حر ومنصان أعتزّ بأمثالو لبنان
وخبّر بكرا يا زمان عن صيّاد مميّز كان
جفتو صايب كلما بان وبيطال النسر العصيان
وخبّر بكرا يا زمان بمار تقلا الملقى كيف كان
دبلت كل زهرة بنيسان ودمعت عا فراقو الحيطان
وخبّر بكرا يا زمان بعد ما كنت حيران
ومن دون فصاحة وبيان ودّعتو بلون الحبّو
بشعر وقوافي وأوزان
