الإعلامية لارا نون للمجذوب : معالي الوزير عم بحكيك من كوكب الأرض قارة آسيا لبنان بالتحديد

كتبت الإعلامية لارا سليمان نون على صفحتها عبر الفايسبوك تعليقاً على قرار وزير التربية والتعليم العالي طارق المجذوب : معالي وزير التربية… عم بحكيك من كوكب الأرض… قارة آسيا… لبنان بالتحديد…
انت كيف وبأي حق بتقرر انو في امتحانات رسمية هالسنة؟…
رح بلش معك يا معالي الوزير بالصباط… انت عارف انو ما معنا مصاري نشتري صباط لولادنا يلّي كبرت إجرُن من سنة لسنة حتى يروحوا يقدمو امتحان ويطلعو حلوين على كاميرات المراقبة؟…
انت عارف انو ولادنا مرضى؟ نفسياً مرضى… وما حدا منكن حرّك حالو يعمل برامج توعية من بعد الانفجار وسرقة الناس والتعتير والشحار؟… انت عارف انو ولادنا ما بقى يسترجو يكونوا وحدن هالفترة من ورا الفرقيع يلي فرقعتوه ب ٤ آب؟…
معاليك… عندك مستشارين يخبروك انو ولادنا ما عم يناموا؟ ما عم يعملو ولا أي نشاط للترفيه عن الدمار يلي دمرتونا ياه؟… ولادنا ما عم نلحق ندرسن لأنو عم ننطر بالصف ساعات لنجيب خبز وبنزين وأكل مدعوم…
حضرتك شو طالب بالتحديد؟… مستوى تعليمي؟؟؟… كيف بدك مستوى بلا كهربا معاليك؟ بلا انترنت؟ بلا ام منهارة واب عم يشحد مصرياتو عبواب المصارف… وعائلات عم تشحد طلب هجرة عبواب السفارات…
معاليك… بإسمي المتواضع وبإسم كل امهات وعائلات لبنان… باسم الجوع والافلاس والدمار وبيوتنا يلي بعدا مكسرة وشحدتوا عليها مساعدات من برا… ما رح نقدم امتحانات رسمية… الى حين عودة الوطن الأوحد… لا المدمج…
ودمتم!