كتبت الاعلامية لارا سليمان نون :بتعرف مين كان في بدفنك؟؟
لا لا ما كان في حدا من يلّي جوّعونا وذلونا… ما كان في حدا من جماعة الصف الأول والمواكبات… خافوا يِجو وينطردوا يا ماتيو…
بتعرف مين كان في؟…
كان في شاب بزاوية الكنيسة مع يبكي عالسكت… هالشاب يلي كان مدمن وعايش دمار وظلمة… بتذكر لما دعيتني عالاحتفال تبعو بمناسبة عودتو لحياة النور ونهاية العلاج من بعد ٥ سنين ادمان… هالشاب يلّي لبّستو انتَ التوب الابيض وغسلتلو اجريه قدام أهلو… وبستُن… ايه… هيدا كان بدفنك يا ماتيو…
لا ما كانوا اغنياء البلد… كان في ختيارة فقيرة عم ترش عليك رز وتقول هالصبي لو ما منو ما كنت اقدر آكل قبل ما آخد حبة الدوا…
بتعرف مين كان في يا ماتيو؟…
كان في افقر الناس… حاملين تابوت متواضع خشب… وعم يرقصوا… عم يرقصوا على وجع عم ينخر بالروح… عم يرقصوا على زفة ما بقى تلبقلنا غير بالمآتم… عم يرقصوا على غصة بتمنعنا نجوع احسن ما نموت من الجوع… عم يرقصوا على اسامي عم تنكتب عالتوابيت بالمقلوب… مدري اسم الابن بينكتب قبل اسم الأب… مدري الأب اختار اسم الابن ينكتب قبلو… ليفدي كل ولادو… كل ولادو يلي بيعيّطلن “يا بيي”… وآخ يا بيي…
