كتبت الاعلامية لارا سليمان نون على صفحتها عبر موقع فايسبوك :
انا… بعدني هونيك… عم لملم صليب دجو نون… وقرآن حمد العطار… حتى خبِّر ولادي انو بهالبلد ما في جمعنا غير الموت…
انا… بعدني هونيك… عم لملم شو بقي من اهراءات القمح… لطعمي ولادي… قمح حلال…
انا… بعدني هونيك… عم لملم جزمة الشباب… حتى علِّم ولادي انو بهيك جزمة بتدعسوا راس اكبر شيطان…
انا… بعدني هونيك… ناطرة معلم التلحيم… عايزتو يجي يفك الصدي تبع باب القصر… وكرسي المملكة… من بعد ما طلعت ريحة الجثث جوا…
انا… بعدني هونيك… عم لملم بقايا فوج الاطفاء… حتى خبر ولادي انو ولاد الباكاوات ما بيحبوا يشتغلوا اطفاء… نظافة الاطفاء بتكشف كمية العفن الموروث فيهن اباً عن جد…
انا… بعدني هونيك… سامعة صوت بنتي عم تصرخ يا ماما انا ما بدي موت… خايفة خبّرها انو الموت تعب من كتر موتنا… انا… بعدني هونيك… عباب المستشفى… عم شوف حرب الجبل وحرب التحرير والالغاء… عم شوف تل الزغتر والاسواق… عم شوف حروب مرقت كان القاتل يحمل سلاحو ويقاتل… ما كان في متل هالحرب… عدو رخيص جبان متخبّى بمملكتو وبعدو عم يتاجر بالدستور وبالدم…
انا بعدني هونيك… عم شوف توابيت بيضا فيها إجر… إيد… بدي خبر ولادي شو صار في أعراس وورد أبيض لاولاد الحكام بهالفترة… أجسامُن كاملة عم ترقص بالحفلات بتوابيت مرصعة بالالماس…
انا بعدني هونيك… عم فتش على شعب لبنان العظيم… على ضو الشمعة… على صوت اطفال عم تبكي من دون حليب… ومن دون دوا… وامهات عم تنضرب قدام بيوت الاقطاعيين…
انا بعدني هونيك… عال عنبر رقم ١٢… ناقصو رقم ٨ ليصير ١٢٨… انا هونيك… نازلة مع شباب الاطفاء… احمي بلادي منن… احمي ولادي منن… وشيل الجثث المعفنة من مراكز القرار… وخلّي ام الشهيد تقرر مين بدو يحكمنا… ابنها حلو ومليح وعيونو عسلية…
انا بعدني هونيك… مع حفار القبور… ب ٤ آب… بالرَفش رح ندفن موتى القصور… والفجور… وبتوابيتكن رح نبني لهالوطن… جسور!
