وجّه المرشّح عن المقعد الماروني في دائرة كسروان – جبيل اميل نوفل في نداء الى الجبيليين قبل يوم من الانتخاب، قائلاً:اهلي وأحبائي بمنطقة جبيل
إنتو وأنا عا موعد مع اليوم التاريخي ، يوم الانتخاب نهار الأحد الجايي .
لازم نخلي التاريخ يشهد إنو تنيناتنا عملنا بكل ضمير ووجدان عا انقاذ مستقبل منطقتنا بالإنماء والعمران والبحبوحة والازدهار .
لازم قرار جبيل يكون طالع من ارض جبيل ولمصلحة أبناء بلاد جبيل.
لأنو مصلحة مستقبل جبيل أكبر من مصلحة الأحزاب والطوائف والتيارات السياسية والأشخاص .
الأحزاب بتاخد وكالتكن لمصلحتها السياسية وما عاد بتسأل عنكن ولا عن ولادكن ولا عن الانماء بضياعكن وبلداتكن .
اربع سنين وأكتر مرقو من حياتنا السياسية ما شافت بلاد جبيل اي مشروع انمائي او عمراني او تربوي او نهضوي …
بلاد جببل ما شافت إلا حرب تويتر وهمية بين نوابها وهني مختلفين فوق الطاولة … وبكل الاوقات متفقين تحت الطاولة لمصلحتهن ومصلحة أحزابهن وضد مصلحتكن .
أحبائي الجبيليات والجبيليين
نهار الأحد لازم نشهد عا محبتنا لقضاء جبيل من الساحل والوسط والجرد .
لازم تكون مصلحة بلاد جبيل فوق كل مصلحة .. وفوق كل اعتبار
وتابع، اميل نوفل عرفتوه من صفوف الشعب . من صفوفكن .
انا حر القرار ،
قراري بيطلع من مصلحتكن .
انا وطني المواقف ،
ومواقفي من تاريخ بلاد جبيل الوطني
انا في خدمة الانماء والعمران لكل بلاد جبيل دون تمييز او تفريق .
بكل الظروف كنت معكن وحدكن .
بالظروف الصعبة والايام العادية كنت معكن عالمرة وعالحلوي .
وهيك اليوم بعلن ترشيحي من خلال ماضيي معكن .
من خلال معرفتي بضياعكن وبيوتكن وحاجاتكن بالتوظيف والمدارس والمستشفيات والخدمات
انا بدعيكن تروحو نهار الأحد تنتخبو .. وتمارسو حقكن بإنقاذ منطقتكن من الحرمان والإهمال .
انتخبو وطلعو جبيل من هيمنة الأحزاب والتجاذبات السياسية يللي حرمت منطقتنا من الاعتمادات وحقها بالنفقات والانماء المتوازن .
اذا بقيتو بالبيت او انتخبتو بورقة بيضا يعني عم تجددوا لنواب ما حققو اي انجاز انمائي لمنطقتكن وأخدو وكالتكن النيابية الى مشاريع أحزابهن السياسية .
خياركن ورا العازل الانتخابي بينقذ منطقتكن .
كونو أحرار بالإختيار حتى ترجعو بلاد جبيل الى عهد الإزدهار .
حتى ترجعو بلاد جبيل الى القرار الوطني الحر .
وختم، نهار الأحد انتو وأنا بدنا نشهد لحرية بلاد حبيل .. لكرامة بلاد جبيل .. لإنماء بلاد جبيل .. لمستقبل بلاد جبيل .
عشتم وعاشت بلاد جبيل .
