كتب الاعلامي جاد أبو جودة: رسالة من القلب الى ناشطي التيار الوطني الحر.
وين ما نروح، في جزء من الناس والوسط الاعلامي بينظرلنا كإعلام حزبي، وكتار منا ما بيقدرو يلاقو شغل تاني بسبب الصبغة الحزبية.
بس بذات الوقت، في كتار من جمهورنا الحزبي، بيستسهلوا كب الحرام على مواقع التواصل، ايام بسبب غلطة عادية ممكن نعملها، وبتصير بكل المؤسسات الاعلامية، متل غلطة ضمة او كسرة او مشكل تقني معين… وايام بسبب عدم قدرتن على التمييز بين عملنا الاعلامي والعمل الحزبي المباشر.
من يومين مثلا، في ناس ما عجبن انو نقلنا قداس اهدن وكلمة فرنجية، وقبلو في ناس اخد على خاطرن لأن حطينا سمير جعجع بالاخبار وغيرو وغيراتو… كل يوم قصة وكل يوم كلام دون المستوى من البعض القليل.
يا جماعة يا اصدقاء يا رفاق:
بأقل الامكانات المادية، وبشبه عجيبة، حافظنا على هالمنبر ليكون صاحب قضية، غير حيادي، لكن موضوعي بنفس الوقت.
وموضوع الالتزام السياسي، معي انا شخصيا بالتحديد ما فيكن تزايدو فيه.
من يومين شفت ناس كاتبين انو محطتنا منحطّة وما بتنقل اخبار التيار.
وقبلو شفت انو محطتنا مع الحزب ضد التيار وقبل قبلو انو المحطة كلها قوات… وهكذا دواليك.
وكل يوم حدا بيسألني مين عاطيكن ايعاز على هالشغلة او هيديك…
يا حبايب قلبي، بكل ضمير حي بقلكن، من بعد تجربة اكتر من 17 سنة، انو اكتر مؤسسة اعلامية فيها حرية بلبنان هيي نحنا.
والمؤسسة شبه الوحيدة يلي ايعازها منها وفيها هيي نحنا…
اما بالنسبة للحزبيين فبقول: منكن حزبيين قدي ولا حريصين على التيار قدي.
ويلي عندو شك يسأل الرموز الكبار واصحاب القرار بالتيار.
وبذكّركن انو التيار الوطني الحر اكبر من حزب.
التيار مشروع وطن وكلمة حزب كتير ضيقة عليه.
هيدا الكلام مش الي. هيدا للعماد ميشال عون، يللي هوي ورئيس التيار جبران باسيل بيرفضو التعتيم على حدا حتى ولو كان من اقسى الخصوم… خاصة انو بطلنا عايشين بالستينات والسبعينات والتمانينات، انما بال2024… بعصر الاعلام المفتوح والسوشيال ميديا، يللي بتسمح للكل انو يسمعو ويشوفو ويتابعو مين ما كان وشو ما كان.
يا جماعة يا اصدقاء يا رفاق:
التيار مش فولار اورانج وكاس وعلامة جوست بعشا.
والتيار مش اغاني هابطة ورقص وفقش وطقش.
والتيار مش كلام بلا طعمة وتعليقات شمال يمين عالفايسبوك وتويتر.
هودي حلوين ومطلوبين ايام، بس بشعين ومضرّين اذا بطّل في غيرن كل الايام.
وساعتها بتكون هيدي اسوأ صورة عم يعطوها البعض القلال للتيار…
بالنسبة الي:
التيار شهيد بالجيش اللبناني خسر حياتو دفاعا عن لبنان وصار تحت التراب.
التيار طالب جامعي ضحى بسنين من عمرو كرمال الحرية والسيادة والاستقلال.
التيار عمل تشريعي جدي بمجلس النواب ومشاريع حقيقية بالوزارات، تماما متل ما اشتغل تكتل التغيير والاصلاح برئاسة الجنرال وتكتل لبنان القوي ورئيس التيار جبران باسيل بوزارات الاتصالات والطاقة والخارجية…
التيار انتماء وطني لكل لبنان ووحدة وطنية مع تقديس التنوع وحرص شديد جدا على الشراكة والمناصفة والميثاق الوطني.
التيار فكر منفتح ودولة مدنية علمانية وقانون موحد للأحوال الشخصية.
التيار نقاش علمي ومنطقي بالفيدرالية وغيرها، مش تأييد او رفض عن تعصب او جهل.
التيار تقبّل للآخر و تفاهمات وطنية مع تنافس سياسي مشروع وقوي لكن تحت سقف الاخلاق.
التيار ناشطين بيعطو المثال لغيرن بالآدمية والذكا والالتزام، مش مجموعة شتامين ضد غيرن وبحق بعضن على وسائل التواصل كل النهار والليل وآخر شي بيحردو وبيصورو بطاقات مخزقة او بيكتبو بيانات استقالة وبيوزعوها قبل ما يرجعو يغيرو رأين بعد فترة.
هيك فهمت العونية من اول ما شفت العماد ميشال عون عالتلفزيون وكان عمري 9 سنين بأول عرض عسكري للجيش اللبناني بعيد استقلال 1988 اول ما صار رئيس حكومة.
وهيك فهمت التيار من 1998، تاريخ اول نشاط شاركت فيه بالجامعة ضد الاحتلال، وكانو القوات والكتائب وغيرن عم يحرضو الناس للمقاطعة نكاية بالتيار مع انو الهدف كان محق ومشترك.
وهيك فهمت التيار من 20 سنة بصوت الغد وصوت المدى والOTV…
تيبقى التيار، خليكن على مستوى ميشال عون…
هيدي هيي الخلاصة… وهيدا هوي العنوان.
