كتبت الإعلامية لارا سليمان نون:”شوف يا صديقي… رح خبرك قصة الكلاب…
مشكلتنا مش مع الكلاب… مشكلتنا مع الكلاب التانية يلي تركونا بلا دوا كَلَب… لحتى مات خالو لرفيقي من كم شهر عباب المستشفى بلا دوا كلَب…
مشكلتنا مع الكلاب التانية يلي عم تلاقي وجبات اكل لكلابها والناس قاعدة بلا اكل… الكلاب التانية يلي عم تاخد كلابها يعملوا وسخُن عالطرقات تحت بيوتنا وولادنا ما إلن محل يلعبوا…
مشكلتنا مع الكلاب التانية يلّي عم يحتفلوا بأعياد كلابن مع قالب غاتو عالسوشال ميديا… وفي ولاد عم ياكلوا ساندويش سكر ليتحلّوا…
مشكلتنا انو بس تقول ل شي رامبو ضب كلبك لأنو عم يشكل خطر علينا… بيهجم عليك وبيهددك بالكلب الكبير زعيمو…
مشكلتنا انو ما بتلاقي كلاب عبراميل الزبالة… لأنو جمعياتن اقوى من جمعياتنا… اقوى من جمعيات الرفق بالانسان… إيه والله هيك… ما بتلاقي غير ولاد عبراميل الزبالة…
مشكلتنا انو صبية قوّصت عكلب… تحاكمت وتحرك الرأي العام… وكلاب داشرة فجّرتنا واحد واحد… رايحين نرجع ننتخبن لأنو “كلب عن كلب بيفرق”…
يا صديقي…
اذا بدك تفهم معضلة هالوطن… دوِّر عالكلاب..”
