بعد أن أعلن الدكتور بشير الياس خلال حفل إطلاق الماكينة الإنتخابية للائحة مشروع ميفوق_القطارة 2025-2031 عن انضمام السيدة ميشلين وهبة سليمان إلى اللائحة ، اشارت وهبة في بيان وجهته إلى الأهالي انها لم تترشح إلى الانتخابات و جاء في بيانها التالي :
أهلي وأحبائي في ضيعتي العزيزة ميفوق القطارة
بوجّهلكن كلمتي اليوم من القلب، وبكل صدق وشفافية.
بشكركن على محبتكن الصادقة، وعلى ثقتكن الغالية، وعلى كل كلمة حلوة انقالت عني، وكل حديث دار باسمي بمحبة ونية صافية.
محبتكن تاج عا راسي، ووسام بعلّقو عا صدري، بيغنيني وبيعطيني قوة، إيمان ومسؤولية أكبر.
اليوم، وبعد غياب شهيدنا الغالي باسكال، الوجع بعده ساكن روحي، والمسؤولية تجاه ولادي صارت أعمق وأكبر؛
هنّي الأمان والأولوية، هني البداية والنهاية.
بعرف تماماً شو يعني العمل البلدي، وبفهم تمامًا قديش ضيعتنا عطشانة لشغل جدّي، فعّال، ومسؤول. وما بقدر، ولا بقبل كون بأي موقع إذا ما كنت قادرة أعطيه كل طاقتي ووقتي. ولهالسبب، وبكل صدق، ما رح كون مرشّحة لهالمعركة . مش لأنو ما بحب ضيعتي، بل لأنو بحب خوضها وأنا بكامل جهوزيتي متل ما بتستاهل وبتستحق.
غيابي عن الترشيح ما بيعني إنو غايبة عن الساحة أبداً.
أنا موجودة، حاضرة، وملتزمة بكل وعي، بكل محبة، بكل شغف وبكل شفافية متل ما تربّينا تنكون وبلا مساومة.
موجودة تا قول الحقيقة، وإدعم الصح، وتا كون صوت كل شخص بعدو مؤمن إنو التغيير ممكن.
والحقيقة اليوم واضحة: ضيعتنا بحاجة لفريق متماسك، عندو مشروع واضح، ورؤية ثابتة. ولهالسبب، أعلن دعمي الكامل والعلني للائحة “ميفوق القطارة كل الدني” برئاسة الصديق والعزيز الدكتور بشير الياس وأعضاء بكِنِّلن كل محبة وإحترام.
لايحة بتشبه تطلعاتنا، وجعنا، وأملنا.
لايحة عندا مشروع، وعندا ناس جاهزين يشتغلوا بكل طاقاتن.
بدّي ادعي كل إنسان بيحب هالضيعة، وبيخاف عا مستقبلها، إنو ينضم إلنا ويصوّت بإيمان، وقناعة، ومحبة.
صوّتوا مش بس بورقة… صوّتوا بقلبكن، بعقلكن، بإيمانكن وبضميركن أكيد.
البلدية مسؤولية والمسؤولية كبيرة، وما عاد فينا نكمّل بالأحلام. صار وقت الفعل، وقت القرار، وقت نبني بإيدينا ضيعتنا، ونعطيها حقا.
التغيير ما بيجي بالحكي، بيبلّش بالفعل، وبالقرار الصح.
شكراً من القلب لكل واحد فيكن. محبتكن بتقويني.
ضيعتنا إلنا، ومسؤوليتنا كلنا.
وإيد بإيد، فينا نردّها مطرح ما بتستحق تكون.
مع محبتي واحترامي الكبير،
ميشلين وهبه سليمان
